Gissur Páll Gissurarson, Bergþór Pálsson, Hlöðver Sigurðsson og Viðar Gunnarsson ásamt Halldóri Smárasyni sem bæði útsetur og leikur á píanó.

Alltaf stutt í glens og gaman hjá þessum Sætabrauðsdrengjum. Þéttur hljómur við fjörugar útsetningar í fyrirrúmi!

Í þetta skiptið verða þeir á léttum nótum dægurlaga, sem allir kannast við, úr ýmsum áttum og frá ýmsum tímabilum. Allt frá ljúflingslögum Fúsa Halldórs yfir í Stína ó Stína og Hæ Mambó!

Rómó en bráðskemmtilegir tónleikar sem hlutu fjórar stjörnur í Fréttablaðinu! Missið ekki af þeim!

Miðasala við innganginn kr. 5.500
Miðasala á miði.is kr. 4900
http://midi.is/tonleikar/1/9063/Satabraudsdrengirnir

Nú í júlí verður nóg um að vera á tónlistarsviðinu hér í Stykkishólmi. Fernir tónleikar eru framundan í Stykkishólmskirkju. Fyrstu tónleikar mánaðarins í kirkjunni er með ungum hæfileikamönnum á íslenska djasssviðinu í Tríói Skarkala. Tríóið er skipað þeim Inga Bjarna Skúlasyni píanóleikara og lagahöfundi, Valdimar Olgeirssyni kontrabassaleikara og Óskari Kjartanssyni trommara. Skarkali hefur tvisvar komið fram á Jazzhátíð Reykjavíkur (2013 og 2014) auk þess sem tríóið tók þátt fyrir Íslands hönd í Young Nordic Jazz Comets árið 2013 í Noregi. Ingi Bjarni var tilnefndur árið 2014 til íslensku tónlistarverðlaunanna sem efnilegasti djasstónlistarmaður Íslands. Diskur með efni tríósins er nýkominn út og verður tónlistin á honum m.a. flutt á tónleikunum sem hefjast kl. 20, miðasala er við innganginn og er miðaverð 1500kr. Tóndæmi

Fyrstu tónleikar sumarsins á vegum Listvinafélags Stykkishólmskirkju verða á Uppstigningadag, 29. maí 2014 og hefjast kl. 20.

Sigurður Flosason saxófónleikari og Gunnar Gunnarsson organisti munu ýta tónleikaröðinni úr vör og fá til sín Kór Stykkishólmskirkju við flutninginn.  Gunnar og Sigurð þarf vart að kynna en þeir eru landskunnir og ríflega það á tónlistarsviðinu.   Saxófónleikarinn Sigurður Flosason og organistinn Gunnar Gunnarsson hófu samstarf sitt árðið 1998.  Þeir héldu sína fyrstu tónleika í Hallgrímskirkju í september 1999 og fyrsta platan, Sálmar lífsins, kom út árið 2000.  Hún snérist um endurútsetngar þekktra sálmalaga og spuna út frá þeim.  Sálmar jólanna kom út árið 2001, en á henni voru sálmar og önnur tónlist tengd jólum tekin til skoðunar.  Þriðji diskurinn, Draumalandið, kom út árið 2004, en hann hefur að geyma íslensk ættjarðarlög í

spunaútsetningum dúósins. Sá fjórði, Sálmar tímans, kom ári 2010 en á honum er fjölbreytt úrval sálamalaga. Þá hefur komið út safndiskurinn Icelandic hymns (2013) en á honum eru eingöngu íslenskir sálmar af fyrri diskum Sigurðar og Gunnars í útgáfu fyrir erlenda hlustendur. Gunnar og Sigurður hafa komið fram á fjölmörgum tónleikum í öllum landshlutum, en auk þess í Þýskalandi, Danmörku, Færeyjum og Álandseyjum.

Sigurður Flosason

Sigurður Flosason lauk einleikaraprófi á saxófón frá Tónlistarskólanum í Reykjavík 1983. Hann stundaði framhaldsnám í klassískum saxófónleik og jazzfræðum við Indiana University í Bandaríkjunum og lauk þaðan Bachelorsprófi  1986 og Mastersprófi 1988. Sigurður stundaði einkanám hjá George Coleman í New York veturinn 1988-1989.  Hann var ráðinn yfirkennari jazzdeildar Tónlistarskóla F.Í.H. 1989 og hefur gegnt því starfi síðan.

Sigurður hefur verið atkvæðamikill í íslensku jazzlífi undanfarin ár.  Hann hefur gefið út á þriðja tug geisladiska. Sigurður hefur tekið þátt í mörgum fjölþjóðlegum samstarfsverkefnum og leikið talsvert erlendis.  Hér á landi hefur hann starfað með fjölmörgum hljómsveitum við flestar gerðir tónlistar.   Sigurður hefur komið mikið fram á tónleikum, leikið á geisladiskum og starfað í leikhúsum auk ýmissa félags- og stjórnunarstarfa tengdum tónlist.  Hann hefur fimm sinnum hlotið íslensku tónlistarverðlaunin og tvívegis verið tilnefndur til Tónlistarverðlauna Norðurlandaráðs.

Gunnar Gunnarsson

Gunnar Gunnarsson lauk kantorsprófi frá Tónskóla þjóðkirkjunnar árið 1988 og lokaprófi frá Tónlistarskólanum í Reykjavík ári síðar. Gunnar stundaði rannsóknir á íslenskum sálmum bæði í Kaupmannahöfn og hér heima og birti niðurstöður í ritgerð sem gefin var út 1993 og nefndist Weyse-handritin og Choralbog for  Island. Þar er fjallað um tilurð fyrstu sálmasöngsbókar Íslendinga og þau  handrit sem hún byggir á. Gunnar lauk BA-gráðu í almennum málvísindum frá Háskóla Íslands 2010.

Gunnar hefur getið sér gott orð fyrir fjölbreytilegan tónlistarflutning og víða komið fram á tónleikum innan lands og utan. Auk hefðbundinna starfa sem organisti og kórstjóri hefur hann útsett og flutt trúarlega tónlist með óhefðbundnum hætti. Einnig hefur hann leikið á píanó með mörgum þekktum tónlistarmönnum og átt þátt í útsetningum og hljóðritunum bæði djasstónlistar og þjóðlegrar tónlistar. Gunnar hefur gefið út sex diska í eigin nafni. Á undanförnum árum hefur Gunnar í auknum mæli útsett tónlist fyrir kóra og sönghópa sem komið hefur út á vegum kirkjunnar.

Gunnar er organisti Fríkirkjunnar í Reykjavík og stundar meistaranám í málvísindum við Háskóla Íslands.